على بابك _بقلم الشاعر /أحمد شاهين

عَلَى بَابَك

ــــــــــــــــــــــــــــــــــــــــــــ

أَنَا النَّدْمَان يَا رَبِّ البِيت

وَانَا الوَاقِف عَلَى بَابَك

بِدَمْع القَلْب انَا حَنِّيت

يَا رَبِّ اقْبَلْنِي فِي رْحَابَك

أَنَا التَّايِه شَرِيد وحَزِين

لإِنِّي فَارِقْت أَحْبَابَك

وِسِبْت النَّفْس لِلشَّيَاطِين

يَا قَلْبِي بَس إِيه نَابَك

بِجَد يَا رَبِّ انَا مَهْمُوم

وِرَاحِة نَفْسِي فِي كْتَابَك

وِهَالِك نَفْسِي ذَمّ ولُوم

أَنَا اللي فَارِقْت انَا بَابَك

أَنَا الظَّالِم وِمُش مَعْصُوم

وِخَايِف لَحْظَه فِي عْتَابَك

وِعِينِي ازَّاي يِجِيهَا النُّوم

وِغِفْلِت يَامَا فِي بْعَادَك

يَا رَبِّ الصَّدْر بَات مَحْزُون

وِعَشْمَان رَحْمَه فِي جَنَابَك

وِشِبْعِت نَفْسِي مِنِّي اللُّوم

وِهَايْبَه الوَقْفَه وِحْسَابَك

أَنَا النَّدْمَان يَا رَبِّ البِيت

وَانَا الوَاقِف عَلَى بَابَك

بِدَمْع القَلْب انَا حَنِّيت

يَا رَبِّ اقْبَلْنِي فِي رْحَابَك

ــــــــــــــــــــــــــــــــــــــــــــ

كلمات الشاعر أحمد شاهين

----- مصر -- أسيوط -----