اعتذار
بقلمي يحيى حسين
بعد ما هدمتي بإيديكي
إللي باقي من جدار
بعد ما شفتي في عيوني
نظرة شوق و انكسار
بعد ما رويتي الأماني
بدمع بطعم المرار
جيتي وأخدتي القرار
ملفوف بكلمة اعتذار
قد إيه النسر قاسي
لما بيعدي الجسور
ويرمي بشباكه اللعينة
فوق أعشاش الطيور
ويقتل أحاسيس جميلة
كانت جوه الصدور
لكن النسر عمره
ما أدعى نبل القرار
وجه يواسي الطيور
قال بكلمة اعتذار
قلبي بحبك أو بغيره
حيفضل مليان بالحنين
قلبي حيفضل تمللي
يتحدى تعب السنين
قلبي حيفضل يدور
قلبي حيفضل جسور
دا إنتي يدوب فى حكايتي
حرف . من بين السطور
قلبي خلاص أخد القرار
انه رافض حتى منك
إي كلمة اعتذار
يحيى حسين القاهرة
6 ديسمبر 2018
ليست هناك تعليقات:
إرسال تعليق