زعلان؟
منى رفيق بولس
لبنان
زِعلان وحدك كيف باقي هون
تحت الشّتي والبرد ووراق الخريف؟
نسيوك يل كانوا يعبّوا الكَون
ويزهّروا عا خشابك الحبّ العفيف؟
وين إيدك تلوِّن بأحلى لَون
إيدَين عِشقانه ونَفَس دافي ورهيف؟!
يا مقعد ال بالشّمس أخشابو
وفسَّخِت عا غياب خِطّابو
تارك عا جرحك لمسة محبّين
بكيوا شَغَف عا صفحة كتابو
هون كانوا .. هون بقيوا سنين
يتمشوروا ومن بعدها غابوا
تركوك وحدك بعد فرحة عُمر
ومشيوا ما قالوا بخاطرك تخمين؟!
ما ودّعوا دروبك برشفة خَمر
ولا سطّروا عالأرض حُبّ سنين
غابوا بآخر يوم متل الجَمْر
رماد المشاعر غرَّق بساتين
يا مقعد ال بالبرد قاهرني
وبوحدتك قدَّيش غامرني
متلك أنا عم عِدّ هالإيّام
بلكي الضَّجر يغفى مع الأحلام
وحدي بإيدي كتاب حرف ولون
وريشة حلا طاير بعبّ الكون
ترسم على النّجمات إنّي هون
وتِترك صدى الرّحلة بتشريني
منى رفيق بولس
ليست هناك تعليقات:
إرسال تعليق