شجرة أمل /السيدابراهيم ياقوت العبد

 شجرة أمل طرحت حياة ورديةْ 

وأنا لسّه ضِلِّ التوتة ساكنْ فيّـه 

والساقية لسّه عروسة واخده 

ف حضنها أغانيَّا 

صوت اليمام زيِّ النفوس ما تحبّ

يِهدي القلب أحلى هديّه 

وف إيدي فاسْ لو إنها تنطق تقول 

أنا برضو لسّه عَفِيّه 

والقمح أغلى من الدهب 

واللقمة لمّا تكون حلال 

ألاقيها بعد الكدّ لقمة هَنِيّه 

يمكن شَقَايا كتير 

والراحة ديمَنْ في الحقيقة شويَّه 

لكنْ سعادتي ف يوم حصاد القمح

مَالْها مثيل 

عرقِي اللي سالْ ع الأرض همّ تقيل

أهُو كله نِعمة وخير وصبر جميل

تعبِي دليل إنّ البيوت عمرانة 

واحْلفْ باللي خلقِ الخلْق 

واللي برحمتُو ادَّاني القليل 

وباركلي فيه فبقيت جبل 

صامِدْ لا مرَّة يميل 

والحِمل أيوه تقيل 

بس الضمير مرتاح 

وأنام ونفسي رَضِيّه 

والحمد لله ، 

اللي هَوِّن كل صعب عليَّا

وأمرني أزرعْ فِ الغِطَان 

شجرة أملْ طرحت حياة ورديةْ 

وسَقاني مِ الساقية اللي صوتها 

لسّه ساكن فِيَّـه

بقلم الشاعر السيد العبد